विवा इन्स्टिट्यूट ऑफ अप्लाइड आर्ट महाविद्यालयात १४व्या वार्षिक कला प्रदर्शनाचे आयोजन !
विरार प्रतिनिधी/ पंकज चव्हाण
विरार येथील विवा इन्स्टिट्यूट ऑफ अप्लाइड आर्ट मधील विद्यार्थ्यांनी सुरेख काम करत देशातील अत्यंत जुन्या संस्थेची बरोबरीच केली आहे" असे उदगार प्रसिद्ध चित्रपट दिग्दर्शक, लेखक व निर्माता श्री रवी जाधव यांनी गुरुवार दिनांक २० फेब्रुवारी २०२५ रोजी सकाळी ११ वाजता प्रदर्शनाच्या ठिकाणी मुख्य अतिथी म्हणून मुलांना मार्गदर्शनपर भाषणात काढले. श्री. रवी जाधव यांच्या हस्ते वार्षिक कला प्रदर्शनाचा उदघाटन सोहळा संपन्न झाला. यावेळी विष्णू वामन ठाकूर चॅरिटेबल ट्रस्ट संस्थेचे खजिनदार श्री. शिखर हितेंद्र ठाकूर तसेच मार्गदर्शक श्री राजू वनमाळी, श्री. अनिल ठाकूर व इतर मान्यवर उपस्थित होते. विष्णू वामन ठाकूर चॅरिटेबल ट्रस्ट चे विवा इन्स्टिटयूट ऑफ अप्लाइड आर्ट ह्या विरार पूर्व, शिरगाव येथील कला महाविद्यालयात २०१० साली बी. एफ. ए. ह्या पदवी मध्ये अप्लाइड आर्ट व पेंटिंग हे दोन अभ्यासक्रम सुरु करण्यात आले आहेत. समारंभाच्या सुरुवातीस प्राचार्या डॉ. संगीता पाटील यांनी विद्यार्थ्यांच्या वार्षिक कामगिरीची दखल घेऊन संस्थेच्या वर्षभराच्या कामाचा आढावा घेत पाहुण्यांचे स्वागत केले. या नंतर संस्थेने सामाजिक बांधिलकीचे भान ठेवत, सात वर्षापूर्वी सुरु केलेल्या अत्यंत्य स्त्युत्य अश्या 'सन्मानपत्र' बहाल करण्याच्या कार्यक्रमास सुरुवात झाली. वसईच्या मातीतील प्रसिद्ध शिल्पकार, हाडाचे कलावंत श्री. शांताराम चिंतामण सामंत म्हणजेच सर्वांना सुपरिचित असलेले श्री दत्ता सामंत यांचा 'सन्मानपत्र' बहाल करत यथोचित गौरव करण्यात आला. सदैव हसतमुख असे व्यक्तिमत्त्व लाभलेले व सुखी समाधानी आणि निरोगी आयुष्य जगणारे श्री. दत्ता सामंत यांनी वयाच्या ९३ व्या वर्षात पदार्पण केले आहे व या समारंभात सरांची उपस्थिती प्रार्थनीय होती. सर जे. जे. स्कूल ऑफ आर्ट या संस्थेत प्राध्यापक म्हणून कार्यरत असताना नवीन विधानभवनात अशोक स्तंभ बसवण्यात सरांचा सिंहाचा वाटा होता. सरांना मिळालेल्या अनेक पुरस्कारांमध्ये सर्वात महत्वाचा असा 'महाराष्ट्र राज्य शासन' पुरस्कार हा होता. सरांच्या निवासस्थानी त्यांना भेटून त्याच्याकडून माहिती घेत त्यांच्यावर विद्यार्थ्यांनी तयार केलेली चित्रफीत कार्यक्रमाच्या वेळी दाखवण्यात आली.
या नंतर श्री. शिखर ठाकूर यांनी त्यांच्या आकर्षक शैलीत विद्यार्थ्यांना मार्गदर्शन केले व प्रमुख पाहुणे श्री. रवी जाधव यांनी विद्यार्थ्यांच्या कामाचे कौतुक करत विध्यार्थ्यांच्या मनातील प्रश्नांना उत्स्फूर्तपणे उत्तरे दिली. सदर कला प्रदर्शन विवा इन्स्टिटयूट ऑफ अप्लाइड आर्ट, शिरगाव, कुंभारपाडा, विरार-पूर्व येथे, मंगळवार दिनांक २४ फेब्रुवारी २०२५ पर्यंत सकाळी ९ ते संध्याकाळी ४:३० दरम्यान सर्वांसाठी खुले आहे. चित्रकला या विषयात उत्तमोत्तम संधी उपलब्ध आहेत तरी त्याबद्दल अधिक माहिती व यात असणारी वेगेवेगळी क्षेत्र याबद्दल प्रदर्शनात असलेल्या विद्यार्थ्यांच्या कलाकृती वरून कल्पना येऊ शकते.
No comments:
Post a Comment