कल्याण परिमंडळ ०३ ची आतापर्यंतची सर्वात मोठी अमली पदार्थविरोधी कारवाई; तब्बल ३४ कोटी १८ लाखांचे हेरॉईन जप्त !!

कल्याण परिमंडळ ०३ ची आतापर्यंतची सर्वात मोठी अमली पदार्थविरोधी कारवाई; तब्बल ३४ कोटी १८ लाखांचे हेरॉईन जप्त !!

डीसीपी अतुल झेंडे यांच्या नेतृत्वाखाली अमली पदार्थ तस्करांवर पोलिसांचा मोठा घाव

कल्याण, संदीप शेंडगे : कल्याण परिमंडळ ०३ अंतर्गत अमली पदार्थ विरोधी पथकाने धडक कारवाई करत तब्बल ३४ कोटी १८ लाख ५४ हजार रुपये किमतीचे हेरॉईन जप्त केले आहे. ही कारवाई परिमंडळ ०३ मधील आतापर्यंतची सर्वात मोठी अमली पदार्थविरोधी कारवाई मानली जात असून, यामुळे अमली पदार्थ माफियांचे धाबे दणाणले आहेत.

डीसीपी अतुल झेंडे यांच्या नेतृत्वाखाली करण्यात आलेल्या या कारवाईमुळे कल्याण परिसरात पोलिसांनी गुन्हेगारीविरोधात कठोर भूमिका घेतल्याचा स्पष्ट संदेश दिला आहे. पोलिसांनी दिलेल्या माहितीनुसार, २१ मे रोजी सकाळच्या सुमारास कल्याण पश्चिमेतील स्मशानभूमी परिसर आणि सांगळे वाडी मार्गावर अमली पदार्थ विरोधी पथक गस्त घालत असताना दोन संशयित इसम संशयास्पद हालचाली करताना आढळले.

पोलिसांनी त्यांना थांबवून चौकशी करण्याचा प्रयत्न केला असता आरोपींनी पळून जाण्याचा प्रयत्न केला. मात्र पोलिसांनी तत्परता दाखवत दोघांनाही जागीच ताब्यात घेतले. झडतीदरम्यान त्यांच्या ताब्यातून मोठ्या प्रमाणात हेरॉईन (गर्द) जप्त करण्यात आले. जप्त केलेल्या अमली पदार्थाची किंमत तब्बल ३४ कोटींहून अधिक असल्याचे समोर आले आहे.

अटक करण्यात आलेल्या आरोपींमध्ये कासिम अब्दुल सतार (वय ३८, शाहापूर, ठाणे) आणि कृष्णा नागण्णा हक्केमणी वय ३६, (सायन कोळीवाडा, मुंबई) यांचा समावेश आहे. प्राथमिक तपासात हे आरोपी अमली पदार्थांच्या मोठ्या रॅकेटशी संबंधित असल्याचा संशय व्यक्त करण्यात येत असून, या प्रकरणातील मुख्य पुरवठादार आणि इतर फरार आरोपींचा शोध पोलीस घेत आहेत.

ही कारवाई पोलीस आयुक्त आशुतोष डुंबरे, सहपोलीस आयुक्त डॉ. दयानेश्वर चव्हाण, अपर पोलीस आयुक्त संजय जाधव यांच्या मार्गदर्शनाखाली डीसीपी अतुल झेंडे आणि सहाय्यक पोलीस आयुक्त अशोक होनमाने यांच्या नेतृत्वात करण्यात आली. या यशस्वी कारवाईमुळे कल्याण परिसरातील नागरिकांनी पोलिसांच्या कामगिरीचे कौतुक केले असून, अमली पदार्थ तस्करांविरोधातील मोहिम आणखी तीव्र करण्याची मागणी होत आहे.