गणेश विसर्जन यापुढे बंद ! डोंबिवलीतील मंडळाचा स्तुत्य निर्णय !!

गणेश विसर्जन यापुढे बंद ! डोंबिवलीतील मंडळाचा स्तुत्य निर्णय !!

*डोंबिवली, राजू नलावडे:* १९७७ मध्ये स्थापना झालेल्या डोंबिवलीतील श्रीखंडे वाडी येथील तरुण मित्र मंडळाचे यंदा सुवर्णमहोत्सवी ५० वे वर्ष होते. या निमित्ताने मंडळाने एक ऐतिहासिक आणि पर्यावरणपूरक निर्णय घेतला आहे.

यावर्षीपासून मंडळाने फायबरची अतिशय सुंदर अशी श्री गणेशाची मूर्ती कायमस्वरूपी विकत घेतली असून यापुढे या मोठ्या मूर्तीचे विसर्जन न करण्याचा निर्णय घेतला आहे. अशी कायमस्वरूपी गणेश मूर्ती घेऊन स्थापना करणारे हे डोंबिवलीतील एकमेव मंडळ ठरले आहे. फक्त छोटी पूजेची मूर्तीच ते विसर्जन करणार आहेत.

मंडळाची स्वतःची मोठी जागा नसल्याने ही कायमस्वरूपी मूर्ती जवळच असलेल्या एका मंगल कार्यालयाच्या हॉलमध्ये ठेवण्यात येणार आहे.

दरवर्षी या मंडळाची विसर्जन मिरवणूक डोंबिवलीच्या प्रमुख रस्त्यांवरून विविध देखावे, चित्ररथ, पथनाट्य, लेझीम, ढोल पथकासह मोठ्या उत्साहात निघते. ही देखणी मिरवणूक पाहण्यासाठी डोंबिवलीकर आवर्जून उपस्थित राहतात.

यापुढेही ही परंपरा कायम राहणार असून मोठ्या मूर्तीसह विविध भव्य देखाव्यांसहित विसर्जन मिरवणूक नेहमीप्रमाणे काढण्यात येणार आहे. मात्र शेवटी मंडपातच ड्रममधील स्वच्छ पाण्यात छोट्या पूजेच्या श्री गणेश मूर्तीचे विसर्जन केले जाणार आहे.