"पशुसंवर्धन पायाभूत सुविधा विकास निधी" या योजनेचा इच्छुक व्यक्ती, संस्थांनी लाभ घ्यावा - जिल्हा पशुसंवर्धन उपायुक्त डॉ सुभाष म्हस्के

"पशुसंवर्धन पायाभूत सुविधा विकास निधी" या योजनेचा इच्छुक व्यक्ती, संस्थांनी लाभ घ्यावा - जिल्हा पशुसंवर्धन उपायुक्त डॉ सुभाष म्हस्के

      बोरघर / माणगांव, (विश्वास गायकवाड) : केंद्र शासनाने सन 2020-21 या वर्षापासून "पशुसंवर्धन पायाभूत सुविधा विकास निधी" या नवीन योजनेस मंजूरी प्रदान केली असून या वर्षात या योजनेकरिता रूपये 15 हजार कोटी निधी उपलब्ध करून देण्यात आलेला आहे.

      या योजनेंतर्गत दूध प्रक्रिया (आईस्क्रिम, चीज निर्मिती, दूध पाश्चराईजेशन, दूध पावडर, इत्यादी), मांस निर्मिती व प्रक्रिया, पशुखाद्य, टीएमआर ब्लॉक्स, बायपास प्रोटीन, खनिज मिश्रण, मुरघास निर्मिती, पशुपक्षी खाद्य विश्लेषण प्रयोगशाळा या उद्योग व्यवसायांना 90 टक्के कर्ज उपलब्ध करून देण्यात येणार असून, व्याज दरामध्ये 3 टक्के सूट देण्यात येणार आहे. 

     या योजनेसंबंधीच्या सर्व मार्गदर्शक सूचना केंद्र शासनाच्या पशुपालन व डेअरी विभागाच्या संकेतस्थळावर (http://dahd.nic.in/ahdf) उपलब्ध आहेत. तसेच राज्याच्या पशुसंवर्धन विभागाच्या संकेतस्थळावरही (http://ahd.maharashtra.gov.in) या माहितीबाबत लिंक देण्यात आली आहे.

    या योजनेच्या लाभासाठी संकेतस्थळावरील पोर्टलद्वारे ऑनलाईन प्रस्ताव सादर करावयाचा आहे. केंद्र शासनाने वर नमूद उद्योग व्यवसायासोबतच लिंग विनिश्चित वीर्य मात्रा निर्मिती, बाह्य फलन केंद्र (आयव्हीएफ), पशुधनाच्या शुद्ध वंशावळीच्या प्रजातींचे संवर्धन या बाबींचा समावेश केलेला आहे.

      या योजनेचा व्यक्तीगत व्यावसायिक, शेतकरी उत्पादक संस्था, खाजगी संस्था, कलम ८ अंतर्गत स्थापन झालेल्या कंपनी यांना लाभ घेता येईल. 

     तरी योजनेच्या मार्गदर्शक सूचना, योजनेसंदर्भात वारंवार उपस्थित करण्यात होणारी प्रश्नोत्तरे, योजनेसाठी ऑनलाईन पध्दतीने सादर करावयाच्या अर्जाचा नमुना आणि आवश्यक कागदपत्रांची यादी याची माहिती घेवून इच्छुकांनी या योजनेचा लाभ घ्यावा, असे आवाहन जिल्हा पशुसंवर्धन उपायुक्त डॉ. सुभाष म्हस्के यांनी केले आहे.