कल्याण लोकसभेत मतदारांना हवेत श्रीकांत शिंदेच पुन्हा खासदार - मुख्यमंत्री एकनाथ शिंदे

कल्याणी लोकसभेत मतदारांना हवेत श्रीकांत शिंदेच पुन्हा खासदार - मुख्यमंत्री एकनाथ शिंदे 

** दहा वर्ष प्रगतीची, कल्याणच्या विकासाची 

डोंबिवली, प्रतिनिधी : आज डोंबिवली येथे श्रीकांत शिंदे यांच्या कामाचा कार्यअहवाल प्रसिद्ध करण्यात आला. या कार्यक्रमानंतर पत्रकारांशी बोलताना मुख्यमंत्री एकनाथ शिंदे यांनी श्रीकांत शिंदे पुन्हा खासदार होतील, असे म्हटले आहे. खासदार श्रीकांत शिंदे यांच्या कार्यअहवाल प्रकाशित झाला. गेल्या १० वर्षांत जी प्रगती झाली, कल्याण लोकसभा मतदारसंघाचा जो सर्वांगीण विकास झाला, त्याची माहिती या अहवालात देण्यात आलेली आहे. भविष्यात या लोकसभा मतदारसंघाची गरज लक्षात घेऊन त्याचाही विचार या ठिकाणी होईल. अनेक वर्षात कल्याण लोकसभा मतदारसंघात जी कामे झाली नाही, ती गेल्या १० वर्षांत करण्याचा प्रयत्न झालेला आहे. पंतप्रधान नरेंद्र मोदी यांनी १० वर्षांत देशाचा विकास केला, त्याप्रमाणे कल्याणमध्येही वेगाने विकास झाला, असे कौतुकोद्गार मुख्यमंत्री एकनाथ शिंदे यांनी काढले.

कल्याण लोकसभा मतदारसंघातील मतदारांनी पुन्हा एकदा श्रीकांत शिंदे यांना निवडून देण्याचा निर्णय, निश्चय आणि संकल्प केलेला आहे. फिर एक बार, श्रीकांत शिंदे खासदार, असा निर्धार मतदारांनी केला आहे. मी त्यांचे मनापासून अभिनंदन करतो. मतदारांनाही शुभेच्छा देतो, असा विश्वास मुख्यमंत्री एकनाथ शिंदे यांनी बोलून दाखवला.

यावेळी आमदार राजू दादा पाटील, आमदार बालाजी किणीकर, आमदार कुमार आयलानी, आमदार ज्ञानेश्वर म्हात्रे, राष्ट्रवादी काँग्रेसचे उपाध्यक्ष प्रमोद हिंदुराव, सुलभा गणपत गायकवाड, आरपीआयचे जिल्हाध्यक्ष, तसेच सर्व महायुतीतील नेते उपस्थित होते. यावेळी श्रीकांत शिंदेच कल्याण लोकसभा मतदारसंघातून मोठा विजय मिळवतील असा विश्वास व्यक्त करण्यात आला.