घाटकोपर मनपा एन विभागात नालेसफाईत महाघोटाळा ?नालेसफाई नाही तर, ही तर हात सफाई ? नालेसफाईच्या कामाची चौकशी करण्याची मागणी !!
नालेसफाई करणाऱ्या कामगारांची सुरक्षा देखील वाऱ्यावर, कामगाराच्या सेफ्टी किटचे पैसे देखील ठेकेदाराच्या खिशात ?
मुंबई, (केतन भोज) : मुंबईत पावसाळ्यात ठिकठिकाणी पाणी साचू नये, म्हणून मुंबई महापालिकेतर्फे दरवर्षी पावसाळ्यापूर्वी नालेसफाई केली जाते. यासाठी पालिका कोट्यावधी रुपये खर्च देखील करते. तसेच यंदा मुंबई महानगरपालिका एन विभागातील संपूर्ण परिमंडळ ६ मधील घाटकोपर मधील नालेसफाईसाठी एकूण १४ कोटींची स्वतंत्र तरतूद केली आहे. नालेसफाईचे टेंडर निघून नालेसफाई सुरू झाली असली तरीही, मनपा एन विभागातील परिमंडळ ६ संपूर्ण घाटकोपर मधील नालेसफाई अद्याप हवी झाली नसून, येथील नालेसफाईचा ठेकेदार जाणीवपूर्वक नालेसफाई मध्ये वेळकाढूपणा करताना दिसत आहे. घाटकोपर मधील सर्वच ठिकाणी नाल्यातील गाळ तसाच पडून आहे. त्यामुळे पावसाळ्याआधी नालेसफाई पूर्ण होणार का, असा प्रश्न निर्माण झाला असून पावसाळयाआधी नालेसफाई पूर्ण होण्याची शक्यता धूसरच आहे. तसेच घाटकोपर पश्चिम मध्ये बहुतांश ठिकाणी डोंगराळ भाग आहे. त्यामुळे वेळेपूर्वी याठिकाणी नालेसफाई न झाल्यास पावसाळ्यात नाले तुंबून नागरिकांच्या घरात हे नाल्याचे सांडपाणी शिरण्याची शक्यता नाकारता येत नाही. तसेच नाल्यातील हा गाळ उद्या पावसाळ्यात रस्त्यावर येऊन याचा नाहक त्रास नागरिकांना होऊ शकतो. याशिवाय या भागात मोठ्या प्रमाणावर शाळा देखील असून पावसाळ्यात शाळकरी मुलांना रस्त्यावरून येजा करताना नाल्यातील गाळ रस्त्यावर आल्यामुळे त्रास सहन करावा लागू शकतो. तसेच योग्य प्रकारे नालेसफाई न झाल्यास पावसाळ्यात याठिकाणी रोगराईला देखील निमंत्रण मिळू शकते. नागरिकांच्या कररूपी पैशातून पालिका प्रशासन ही कामे दरवर्षी करत असते. त्यामुळे याठिकाणी संबंधित नाले सफाईचा ठेकेदार आणि पालिका प्रशासन मात्र बेजबाबदारपणे वागत असल्याचे चित्र दिसत आहे. त्यामुळे घाटकोपर एन विभागात नालेसफाईत महाघोटाळा ? होत असून ही नालेसफाई नाही तर, ही तर हात सफाई आहे ?असा प्रश्न नागरिक विचारत आहे. तरी अशा बेजबाबदार नालेसफाईच्या कंत्राटदारावर कारवाई करून कायमस्वरूपी ब्लॅकलिस्ट मध्ये टाकावे आणि या सर्व प्रकरणाची प्रमुख अभियंता दक्षता तसेच मनपा परिमंडळ ६ चे उपायुक्त आणि वरिष्ठ अधिकारी, Ai यांनी याची सखोल चौकशी करावी अशी मागणी स्थानिक नागरिक तसेच सामाजिक कार्यकर्ते करताना दिसत आहेत.
नालेसफाई करणाऱ्या कामगारांची सुरक्षा वाऱ्यावर, कामगाराच्या सेफ्टी किटचे पैसे देखील ठेकेदाराच्या खिशात ?
घाटकोपर मध्ये नालेसफाई करणाऱ्या कामगारांची सुरक्षेची काळजी देखील ठेकेदाराकडून घेतली जात नसून, त्यांच्या सुरक्षेतेसाठी कोणत्याही प्रकारचे सुरक्षा किट ठेकेदारकडून दिले गेले नसून, सुरक्षा किटच्या निधीवर ठेकेदाराने डल्ला मारला आहे का? मागे विक्रोळी पार्कसाईट मध्ये नालेसफाई करताना एका कामगाराचा सुरक्षा किट नसल्यामुळे मृत्यू झाला होता, तर या प्रकरणातून मनपा एन विभागाचे संबंधित अधिकारी तसेच नालेसफाईचा ठेकेदार याने कोणताही बोध घेतलेला दिसत नसून, अजून पुढे कोणत्या तरी कामगाराचा मृत्यू होण्याची वाट संबंधित मनपा एन विभागाचे अधिकारी आणि ठेकेदार बघत आहे का? असा प्रश्न याठिकाणी निर्माण होत आहे. तरी अशा बेजबाबदार नालेसफाईच्या ठेकेदारावर कठोर कारवाई करण्यात यावी अशी मागणी स्थानिक नागरिक करत आहेत.
No comments:
Post a Comment