बातमीदार माझा

*वडोदरा-जेएनपीटी महामार्गावर एरंजाडजवळ भीषण अपघात; दोघांचा जागीच मृत्यू, एक मुलगी गंभीर जखमी*

*बदलापूर, दि. २१, प्रतिनिधी* : वडोदरा-जेएनपीटी महामार्गावर एरंजाड गावाजवळ रविवारी पहाटे भीषण अपघात घडला. टिटवाळा दिशेकडून बदलापूरकडे भरधाव वेगाने येणाऱ्या बीएमडब्ल्यू कारचा चालकाचे नियंत्रण सुटल्याने कार दुभाजकावर आदळून पलटली. या अपघात एक पुरुष आणि एका महिलेचा जागीच मृत्यू झाला असून एका मुलीला गंभीर दुखापत झाली आहे.

*२५१ किमी वेगाने कार, चुराडा*  

प्राथमिक माहितीनुसार, हा अपघात पहाटे सुमारे २ वाजण्याच्या दरम्यान घडला. रस्ता मोकळा असल्याने बीएमडब्ल्यू कार तब्बल २५१ किमी प्रतितास वेगाने धावत होती. चालकाचे वाहनावरील नियंत्रण सुटल्याने कार थेट दुभाजकावर आदळली. धडकेची तीव्रता इतकी होती की बीएमडब्ल्यू कारचा अक्षरशः चुराडा झाला.

अपघातानंतर वाहनाचे सुटे भाग आणि मृत व्यक्तींच्या अवयवांचे तुकडे रस्त्यावर दूरपर्यंत विखुरले होते, असे घटनास्थळी मदतीसाठी धावलेल्या नागरिकांनी सांगितले. कारच्या धडकेचा आवाज परिसरात मोठ्या प्रमाणात ऐकू आल्याची माहिती स्थानिकांनी दिली.

*पोलिस आणि फॉरेन्सिक पथक दाखल*  

घटनेची माहिती मिळताच पोलिसांनी तात्काळ घटनास्थळी धाव घेऊन पंचनामा केला. फॉरेन्सिक पथक आणि तपास यंत्रणाही घटनास्थळी दाखल झाल्या असून अपघाताचे नेमके कारण शोधण्याचे काम सुरू आहे. गंभीर जखमी झालेल्या मुलीला तातडीने उपचारासाठी रुग्णालयात दाखल करण्यात आले आहे.

*सुरक्षिततेचा प्रश्न ऐरणीवर*  

वडोदरा-जेएनपीटी महामार्गावरील एरंजाड परिसरात यापूर्वीही अनेक गंभीर अपघात नोंदवले गेले आहेत. त्यामुळे या मार्गावरील वेगमर्यादा, दुभाजकाची सुरक्षा आणि रस्ता सुरक्षिततेचा प्रश्न पुन्हा एकदा ऐरणीवर आला आहे. पोलिसांकडून पुढील तपास सुरू आहे.