कोकणाच्या विकासासाठी सर्व राजकीय पक्ष - संघटनांनी पुढे यावे - उद्योग मंत्री उदय सामंत
** ग्लोबल कोकण महोत्सवाला उस्फूर्त प्रतिसाद हापूस आंब्याच्या होलसेल मार्केटला मोठा प्रतिसाद
मुंबई, प्रतिनिधी :
ग्लोबल कोकण सारख्या महोत्सवामुळे कोकणाची खरी ओळख सर्वांना होत आहे, तर समृद्ध कोकण सारख्या चळवळीमुळे कोकणवासीय परत कोकणात येण्यासाठी प्रोत्साहित होतील, म्हणूनच कोकणाच्या सर्वागीण विकासासाठी, समृद्धीसाठी आणि प्रगतीसाठी सर्व कोकणप्रेमी राजकीय पक्षांनी व संघटनांनी एकत्र येण्याची गरज असल्याचे प्रतिपादन राज्याचे उद्योग मंत्री व कोकण महोत्सवाचे अध्यक्ष उदय सामंत यांनी केले आहे.
दि. 6 ते 9 मार्च दरम्यान मुंबई, गोरेगाव नेस्को सेंटरमध्ये ग्लोबल कोकण महोत्सवाचे आयोजन करण्यात आले असून यावेळी आयोजित करण्यात आलेल्या विशेष कार्यक्रमात ते बोलत होते. यावेळी बोलताना त्यांनी सांगितले की, मला अभिमानाने सांगायचे आहे की कोकण हा कॅलिफोर्नियापेक्षा अधिक समृद्ध आणि प्रगत आहे. रत्नागिरी येथे संरक्षण क्लस्टर विकसित होत आहे, जिथे साडे सहा हजार युवकांना रोजगाराच्या संधी उपलब्ध होतील. तसेच, आगामी सेमीकंडक्टर प्रकल्पामुळे २० हजार युवकांना रोजगार मिळणार आहे. पर्यावरणपूरक आणि प्रदूषणमुक्त उद्योग तसेच कारखान्यांचे स्वागत केले पाहिजे, जे कोकणातील रोजगाराच्या संधी वाढवू शकतात, असेही त्यांनी सांगितले.
ग्लोबल कोकण महोत्सवाला भेट देणाऱ्यांची खूप मोठी संख्या असून शाश्वत पर्यटनाचं महत्त्व अधोरेखित करणारी विशेष गॅलरी इथे पाहायला मिळत आहे तर बोरिवली नॅशनल पार्क, ठाणे मंग्रोव्ह आणि सह्याद्री पर्वतरांगांमधल्या जैवविविधतेची झलक या दालनात मांडण्यात आली आहे.
या महोत्सवात कोकणच्या लोककलेलाही विशेष स्थान दिलं आहे. कोळी नृत्य, तारपा नृत्य, जाखडी, गौरी नृत्य आणि दशावतार नाट्यप्रकार सादर केले जात आहेत. याशिवाय, आधुनिक मराठी संगीताला ग्लोबल स्टेजवर स्थान देण्यासाठी हिप-हॉप, रॅप आणि बीटबॉक्सिंगसारखे कार्यक्रम आयोजित करण्यात आले आहेत.
महिला बचत गटांनी तयार केलेल्या स्थानिक हस्तकला वस्तु, खाद्यपदार्थ आणि विविध उत्पादनं इथे विक्रीसाठी ठेवली आहेत. कोकणच्या पारंपरिक खाद्यसंस्कृतीचा आस्वाद घेण्यासाठी मालवणी, आगरी आणि संगमेश्वरी पदार्थांची खास दालनं असून त्याला खवय्यांचा विशेष प्रतिसाद मिळत आहे.
कोकण भूमी प्रतिष्ठानचे संस्थापक संजय यादवराव म्हणाले, "या वर्षी ग्लोबल कोकणला लोकांकडून उत्स्फूर्त प्रतिसाद मिळत असून कोकणची समृद्ध संस्कृती, खाद्यसंस्कृती आणि पर्यटन स्थळांचा जागतिक स्तरावर प्रचार हा महोत्सवाचा मुख्य उद्देश आहे. स्थानिक कलाकारांना जागतिक व्यासपीठ मिळावं, कोकणात तयार होणाऱ्या खास उत्पादने थेट ग्राहकांपर्यंत पोहोचावीत आणि कोकणच्या पर्यटनाला चालना मिळावी यासाठी हा महोत्सव दरवर्षी अधिक भव्य स्वरूपात आयोजित केला जातो तसेच हापूस आंब्याचे होलसेल मार्केट कोकणात सुरू करणार! थेट शेतकरी ते देशभरातल्या व्यापारी ही संकल्पना ग्लोबल कोकण राबवणार असल्याचेही त्यांनी सांगितले.
ग्लोबल कोकण महोत्सवात गुंतवणूकदारांसाठी विशेष दालनं उभारण्यात आली आहेत. जेएसडब्ल्यू जिंदाल पोर्ट, जवाहरलाल नेहरू पोर्ट ट्रस्ट, एमएसआरडीसी आणि सिडको यांनी कोकणातील नव्या पायाभूत सुविधांची माहिती इथे मांडली आहे.
*६ ते ९ मार्च दरम्यान नेस्को कॉम्प्लेक्स, गोरेगाव येथे सुरू असलेल्या या महोत्सवाला भरभरून प्रतिसाद मिळत आहे. कोकणप्रेमींनी मोठ्या संख्येने उपस्थित राहून कोकणाचा हा सांस्कृतिक आणि व्यावसायिक सोहळा अनुभवावा, असे आवाहन आयोजकांकडून करण्यात आले आहे.*
कोकणाची शोभा, संस्कृती आणि समृद्ध वारसा ग्लोबल कोकण फेस्टिवल या छताखाली पाहायला मिळत असून. इथे आलात की, सह्याद्रीच्या डोंगररांगा, निसर्गाच्या कुशीतली पर्यटन स्थळं, गजबजलेले समुद्रकिनारे आणि हिरवाईची चादर पांघरलेली जंगलं तुमच्यासमोर उभी राहत असल्याचे अनुभवायला मिळत असल्याची प्रतिक्रिया व्यक्त होत आहे.
सौजन्य _
जयेश लडकू शेलार पाटील
अध्यक्ष - कोकण विभाग
कोकण विभाग पत्रकार संघ
